ரஹ்மான் சகோதரியின் இசை

ரஹ்மானின் சகோதரி ஏ.ஆர். ரைஹானா ஒரு இசை அமைப்பாளர் என்றாலும் பிஸியானவர் இல்லை. இவருக்கு எப்போதாவது ஒரு படம் வரும். அந்தப் படமும் அநேகமாக பட்ஜெட் படமாகத்தான் இருக்கும்.

ஆஹா ஓஹோ என்று ஓடுகிற படமாகவும் இருக்காது. இதனால் இவருடைய பெயரும் கொஞ்சம் பிரகாசமாக இல்லைதான். இப்போது இவர் ‘பேசுவது கிளியா’ என்ற படத்திற்கு இசை அமைத்துள்ளார்.

இந்தப் படம் எய்ட்ஸ் நோயின் பாதிப்புகளையும் அது குறித்த விழிப்புணர்வையும் ஏற்படுத்துகிற படம். இதனாலேயே இந்தப் படத்திற்கு உடனடியாக இசை அமைத்துக் கொடுத்திருக்கிறார் ரைஹானா. இந்தப் படத்தில் விருட்சிகா என்ற பெண் பாடலாசிரியர் ஒருவரும் ஒரு பாடல் எழுதியுள்ளார்.

இந்தப் படம் குறித்து அதன் இயக்குநர் கௌரி சங்கர் ‘எய்ட்ஸ் நோயினால் பாதிக்கப்பட்ட ஒரு பெண்ணுக்கு ஏற்படும் பிரச்சனைகளையும் நட்பு கரம் கொண்டு அவளை அரவணைக்கும் நண்பர்களையும் மையப்படுத்தி இப்படத்தை இயக்கியுள்ளேன்’ என்கிறார்.